المصدر الاخبارية
شبكة المصدر الاخبارية

آية صقر تكتب : فيها ايه بجد لو ركبت عجله ؟؟ !!

274

الحكايه بتبتدي بأنك تعلن لحد من أصحابك إنك عايز تجيب عجله تروح بيها الشغل أو الجامعة , أو حتى تجيبها كده من باب الترفيه عشان تحضر إيفنتات العجل الي إنتشرت بطريقه كبيره وواسعة الفتره الي فاتت ‘ وساعتها بتقابل نوعيين من الأصحاب ..النوع الأول هيقولك قشطه وأنا دايس معاك و النوع الثاني الي هيبصلك من فوق لتحت كده ويضحك و إحتمال الضحكه دي تنتهي بجملة (قال عجله قال !) .
نيجي بقى للمرحله الثانية .وهي إعلان الكارثة والمصيبة دي للناس الي عندك في البيت ..طبعا ماما أول ما هتعرف هتصوت وتتخانق وتقولك لا على جثتي،، وهتموت و العربيات هتفعصك !!(المفروض الكلمه دي بتتقال على الحشرات ! ) وبتبقى شايفه إن كده إبنها ضاع وإنه هيضيع فلوسه في حجات تافهه و أولى واهم إنه يتجوز بيهم ..على أساس أن ال ٣٠٠٠جنية دول بيجيبوا ثلاجة حتى في الزمن ده .وبعدين طبعا الحج بيسمع خناقها وينضم ليها.. وبعد خناقات ومجادلات و مؤتمرات قمة وبعد موافقتهم هتتجاب العجلة بس بشرط معاها مستلزمات السلامة من خوذه وغيره وندخل بقى للمرحلة الثالثة .. مرحلة التريقة في الشارع هتلاقي الي يقولك ايه ده يامعلم ..والي يقولك انت فاكر نفسك في امريكا…والي يقولك العب بعيد ياشاطر …والي يزنق عليك بالعربية وانت مش فاهم ليه بس هو كده رخامة ..والي يبقى راكب عربية يجي بربع مليون مثلا ويقولك ايه ده تبدل هععهععع. (هو بيضحك كده والله ) ونيجي بقى للمعاكسه هتلاقي بنات بتعاكسك ..اه والله بتحصل ..دي ممكن توصل انك تلاقي واحده بتقولك ايه السمانه دي (مع إعتراضي على كلمة واحده ) وهتلاقي كائن صغير بس يحير كده إسود في أصفر بيشتغلك و هيبقى هو بالنسبه لك الوحش بيسمى هذا الكائن بالتكتوك !! و بيعتبر أزمه مجتمعية و الي بتقابله طول ما انت رايح جاي خاصة لو ماشي في مناطق متوسطة هتلاقيه بيرخم وبيزنق وبيعاكس وممكن الموضوع يوصل لتحرش ..اه والله زي مابقولك كده ..
المهم ان الواحد ماييأسش ويفضل مكمل ومايزهقش .
طبعا الكلام ده لو انت ولد لكن لو بنت هنقف عند المرحله الأولى مرحلة الاصحاب ..ولو اصحابِك دماغهم كبيرة شويه وأوبن يبقى هنقف عند المرحلة الثانيه مرحلة إعلان الكارثة في البيت الي إحتمال كبير توصل بحبسك في البيت ومنعك من نزول الجامعة و ممكن كمان لو بتشتغلي يقعدوكي من الشغل ولا انك تفكري في الفُجر ده ، ويااااه بقى لو متجوزة فتأكدي إن الموضوع هيقف عند مرحلة تفكيرك بس فية .
هما معزورين كل الي بيرفضوا الفكرة دي بالنسبة للبنات فاكرين إنهم بيحموهم ، بس الفكرة إنهم مايعرفوش ان تزنيق حد علينا وإحنا راكبين العجلة _الي ممكن يحصل أو مايحصلش_ و رخامة أي حد أو كلامه مش هيتعدى والواحدة راكبة العجلة إلا تحرش لفظي .وثاني هقول ده ممكن يحصل وممكن مايحصلش ..
لكن الي مؤكد بقى إننا كبنات بنواجه حجات أفظع من كده بكثير جدا في المواصلات والموضوع بيتعدى التحرش اللفظي بكثير ..
في بنات كثير بتبقى شايفه إن حد يقول عليها إنها مش محترمة لمجرد إنها راكبة عجله(مع اني مش عارفه ايه مقياس عدم الإحترام في كده) وإنها تواجه كل الي بيحصلها ارحم واهون من الي بتواجهه كل يوم في المواصلات ..
الي عايزه اوصله سواء كنت ولد أو بنت ده مش فارق إعمل الي يريحك والي انت شايفه صح ، طالما مابتإذيش حد من المقربين ليك ولا بتعمل حاجة حرام و هتخرجك من دينك..جدتي الله يرحمها كانت بتقول في المواقف الي زي دي (طنش تعش تنتعش) …. سيبك من كلام الناس..

تعليقات
جاري التحميل ....