خالد علي يكتب عن التنكيل بطارق حسين: جرائم كبيرة في حق أولادنا وبلدنا

60

كتب / Written by: سها رامي

من ٢٥ يوم قبضوا على المحامى طارق حسين بسبب رفض التنازل عن مصرية تيران وصنافير، النيابة قررت إخلاء سبيله، لكن الداخلية ادعت إن طارق عليه أحكام غيابية، وقولنا ليهم دا كلام مش حقيقى، طارق ليس عليه أي أحكام، لكنهم جابوا كل الأحكام اللى ضد مواطنين اسمهم شبه اسمه عشان يلف كعب داير على النيابات اللي فيها الأحكام دى، منها أحكام تبديد منقولات زوجية وهو غير متزوج، وسرقة تيار كهربائي بمنزل فى الإسكندرية وهو ليس له أي عقارات بأي مكان، ومنها حكم صدر وطارق كان عنده خمس سنوات، ورغم إننا قدمنا شهادة ميلاده المثبت فيها كافة بياناته ومنها اسم الأم ليتم مضاهاة بياناته مع بيانات من صدرت الأحكام ضدهم لكن الداخلية رفضت من خلال قاعدة بيانات الحاسب الآلي بالبحث الجنائي بالأمن العام، وبالتالي أصبحنا أمام طريقين إما نعمل معارضات على كل الأحكام دى بالتوكيل عشان طارق يخرج بسرعة، أو يروح النيابة المختصة مكانياً بكل حكم ويرفض يعمل معارضة لأن الحكم لا يخصه، والنيابة تطلب تحريات من المباحث للتيقن من ذلك، والإجراءات دى فى كل حكم ممكن تاخد ٣ أيام، طارق كان متحمل وصابر لكن صبره نفذ، وكان فى ٣ أحكام فى الإسكندرية ومطروح والجيزة، وعشان مايترحلش للمحافظات دى طلب يتعمل ليه معارضات رغم أنهم مش أحكامه، وبالفعل اتعملت معارضات فى الإسكندرية ومطروح، أما الجيزة فالاسم الرباعي لطارق هو (طارق محمد أحمد حسين) واسم من صدر ضده الحكم ( طارق محمد أحمد حسن) وبالتالى مينفعش يتعمل معارضة بالتوكيل لاختلاف الاسم ، فتم استخراج صورة من الحكم ومكتوب عليه اسم وعنوان من صدر ضده الحكم، وبيختلفوا عن اسم وعنوان طارق وسنه، وبدل ما الداخلية تخلى سبيل طارق بعد ما المحامين خلصوا الإجراءات دي وسلموا الأحكام والشهادات لقسم عين شمس من 9 أيام، الداخلية رحلت طارق لقسم إمبابة، وتم إيداعه إحدى السجون من ٩ أيام وبينفذ حكم لم يصدر ضده، ولم يتم إخطار أهله أو محاميه بمكان احتجازه، ولم يتمكنوا من زيارته.

حكاية طارق زى آلاف الحكاوي اللى بقينا بنسمعها رغم إن كلها ظلم ومرار وإهدار للقانون، البعض من كتر الهم بيتعامل انه أمر عادى، كل دا مش عادى، ومش لازم نتعامل إنه عادى، كل دى جرايم، وجرايم كبيرة فى حق ولادنا وبلدنا.

اكتبوا عن طارق، وعن كل المظلومين فى السجون، وعن كل المختفين قسرياً.

About سها رامي

صحفية مصرية بموقع المصدر الإخباري مهتم بالشأن العام
الرابط المختصر

قد يعجبك ايضا

تعليقات

جاري التحميل ....
%d bloggers like this: